HelgeDyrkolbotn

Auka kommunalt vedlikehald og ein ungdomsskule i Austrheim

2011-09-04T20:58:00.000Z

Austrheim KrF er no klare for innspurten av valkampen. Og er du i tvil om du ynskjer å bruke KrF si liste 12.september, så håper eg at du synes at Austrheim KrF har eit så godt program og så gode kandidatar på lista at du vel å bruke denne. Kva ynskjer så vi i Austrheim KrF å ha fokus på dei neste 4 åra? Mange utfordringar står framføre det nye kommunestyret og dei nye politikarane som finn sin plass der. Austrheim KrF har mellom anna desse to sakene som vi ynskjer å dra fram:

- Auka vedlikehald på kommunale eigedomar

- Samla ungdomsskuletrinnet på ein skule

Og då har vi ikkje gløymd at vi ynskjer eit auka fokus på innhaldet i tenestene kommunen gjev deg som innbyggjar eller at vi ynskjer å auka satsinga og støtta til det flotte frivillige arbeidet som vert gjort kvar dag i Austrheim.

Auka vedlikehald: Vi ser at det er store behov for å satsa ekstra på vedlikehald av kommunale eigedomar, dvs både vegar og bygningar. Kommunen har eit stort etterslep på dette vedlikehaldet, og KrF meiner det må takast eit krafttak NO! Det må vi ha råd til, og det har vi råd til. Auka vedlikehald er med på å gje enno betre tenester, mellom anna innan pleie og omsorg, i barnehagane og i skulane våre.

Samla ungdomsskuletrinnet: No har vi i Austrheim to ungdomsskular som ligg ikkje meir enn 10 – 15 minutt køyring frå kvarandre. Begge er relativt små. Krf ynskjer å samle alle ungdomsskuleelevane under same tak. Slik vi ser det vil dette styrke læringsmiljøet, det faglege tilbodet og gje gode sosiale fordeler. Ungdommen i ungdomsskulealder i Austrheim er ikkje fleire enn at det vil vera svært positivt for dei å vera samla og bli godt kjende med kvarandre. Dette vil styrke samholdet i kommunen. Å samle ungdomsskuletrinnet slik Krf går inn for vil også vera med på å styrke det faglege miljøet for lærarane ved skulane.

Om du er samd i dette kan det vera ein god ide å bruke Austrheim KrF si liste når du går til stemmelokalet 12.september.

Her er det inspirasjon å hente.......

2011-04-29T18:51:00.000Z

- Dag ein av KrF sitt landsmøte 2011

Eg er så heldig at eg er ein av dei 13 utsendingane frå Hordaland til KrF sitt årsmøte som er her i Trondheim denne helga. Supert å vera samla saman med gode Krf-arar frå heile landet.

Dagfinn Høybråten hadde ein strålande tale tidleg i dag. Han la vekt på kva betydning menneskeverdet har for oss i KrF. Han drog oss med til arbeidet blant dei fattigaste i verda til den oppveksande slekt her i Norge. Han peika på betydningen KrF kan ha for einskild mennesket – vi må gjera ein forskjell.

Å høyra Høybråten i hans siste tale som leiar i partiet gjev stor inspirasjon til å stå på i lokalpolitikken. Vi i KrF kan bety ein forskjell for innbyggjarane i Austrheim!!!! Difor søker vi makt gjennom å kunne ha ei fyldig og god gruppe i kommunestyret.

No er kl.2000 og middagen er unnagjort. Kva gjer vi då på landsmøte i KrF? Jau då går vi i landsmøtesalen og set i gang debatten omkring bekjennelsesparagraf og lovendringar. Og her er det mange som vil ha ordet…………

Kristian Helland var førstemann som tok ordet, og han orienterte om at eit solid fleirtal av Hordalandsdelegasjonen kjem til å gå inn for å endra paragrafen.

Debatten, og heile landsmøtet, kan fylgjast på http://www.krf.no/

Overkøyring av lokalsamfunna

2011-02-01T12:07:00.000Z

Dette er eit lesarinnlegg i lokalavisene frå KrF i Radøy, Lindås, Hordaland fylkeskommune og Austrheim.

Det er nesten ubegripeleg for oss at NVE har valt å gå inn for 20 km med luftspenn og kun 15 km med sjøkabel for den nye kraftlinja mellom Mongstad og Kollsnes. Vi har ikkje noko imot at det vert bygd ny linje som er med på å sikre straumforsyninga i bergensområdet og ut til oljeinstallasjonane i Nordsjøen. Tvert imot. Vi kan sjå behovet for stabile og gode ferdselsårer for å levere straum. Men vi hadde tiltru til at NVE hadde valt løysingar som hadde imøtekome oss som bur i desse kystkommunane, og løysingar som betre hadde ivareteke det sårbare og opne kystlandskapet vi har her i desse berørte områda i Lindås, Austrheim, Radøy og Øygarden.

Linjetraseen som NVE anbefaler Olje og energidepartementet å gå inn for går gjennom eit flatt og ope kystlandskap som kunne vore skåna ved å bruke meir sjøkabel og meir kabel i jorda. NVE direktør Agnar Aas forsvarer valet med at det er viktigare med å sikre straumforsyninga enn å ta omsyn til eit sårbart landskap. Og han seier det vi alle har trudd, det er økonomien som avgjerd val av løysingar. Når vi veit at mykje av grunnen til at denne kraftlinja skal byggjast har med oljeindustrien sitt behov for store straummengder både på land og offshore å gjera, er det nærliggjande å spørje seg; kvifor kan ikkje oljeindustrien betale for meirkostnaden med å få linja i jord- og sjøkabel???

NVE peikar sjølv på kor sårbart kystlandskapet i desse kommunane er, mellom anna vil luftlinja gå gjennom områder med raudlista fugleartar og områder med stor verdi for friluftsliv og kulturmiljø. Og ikkje minst gjennom viktige og flotte bustadområder. Linja må kryssa Fosnstraumen med nokre av dei eldste busettingane det er funne spor av i landet vårt.

Krf vil kjempa imot at kraftforsyninga mellom Mongstad og Kollsnes skal gå i luftspenn, og vi håpar at Nordhordlendingane står saman i kampen for å få linja i kabel, både i sjøen og i jordkabel. Det er viktig at vi alle synleggjer våre meiningar for dei som skal ta avgjersla, leiinga i Olje og energidepartementet og statsminister Jens Stoltenberg.

Eit lite paradoks til slutt. Vi som styrer politisk i kystkommunane våre veit kor vanskeleg det er å få gjennomslag for å ta i bruk litt av strandsona vår til nyttige formål for innbyggjarane våre, medan det ser ikkje ut til at det er like vanskeleg for styresmaktene å rasere den same strandsona og kystlandskapet vårt.

Grethe Lunde                                        Astrid Aa Byrknes
Radøy KrF                                           Lindås KrF

Pål Kårbø                                            Helge Dyrkolbotn
Gruppeleiar                                         Austrheim KrF
Fylkesgruppa KrF

Austrheim vidaregåande skule - ein skule for framtida!

2010-12-10T11:48:00.000Z

I dag legg eg eit innlegg her på bloggen som alle gruppeleiarane i kommunestyret i Austrheim har skrive under på. Inlegget omhandlar Austrheim vidaregåande skule, og er sendt til lokalavisene som lesarinnlegg.

Austrheim vidaregåande skule

- ein skule for framtida!
Det har igjen vore harde kampar kring linjer og tilbod ved Austrheim vidaregåande skule (AVS). Etter innstilling frå fylkesadministrasjonen såg det ut til at AVS skulle mista fleire av linjetilboda sine, mellom anna studiespesialisering/allmenn Vg1 og automasjon.
For oss som lokalpolitikarar i Austrheim er AVS særedeles viktig. Vi ynskjer at ungdommen vår skal kunne bu heime og ta skulegongen i sitt eige lokalmiljø. Vi ser også at skulen gjev eit godt tilbod til ungdom i nabokommunane våre og jamvel til ungdom frå Gulen og Solund i nabofylket. Difor var det gledeleg å sjå at Opplærings- og helseutvalet i møte 1.desember og seinare at Fylkesutvalet i møte 8.desember gjekk imot administrasjonen si nedleggingstilråding. Skulen får behalda studiespesialisering Vg1 og studiespesialisering 3på/allmennfagleg påbygging. Diverre må vi konstatera at det ikkje vert automasjon Vg2 linje ved AVS neste skuleår.
Vi er glade for vedtaket i Fylkesutvalet. Det er svært viktig for skulen. No ynskjer vi å be om at Austrheim vidaregåande skule får arbeidsro i åra framover utan å ha trusselen om nedlegging av linjer hengjande over både administrasjon, lærarar og elevar. Slike trugsmål skaper berre uro og dårlege arbeids- og læringsmiljø.

Også i samband med budsjettarbeidet hjå fylkeskommunen sist år var spørsmålet om nedlegging av linjer i AVS oppe til drøfting. Då som no, har det politiske miljøet i Austrheim stått tett saman om å få oppretthalda eit godt skuletilbodet ved AVS. Det har vore tverrpolisk semje om at AVS er viktig og at vi ynskjer eit godt tilbod. Dette har nok fylkespolitikarane fått merka i det siste, og vi er svært takksame og nøgde med at vi har blitt høyrt.
Austrheim vidaregåande skule er også svært viktig for næringslivet i Mongstadregionen. Skulen har eit godt utdanningstilbod innan yrkesfag til elevar som ønskjer å gå i lære og ta fagbrev og seinare jobb i bedriftene knytt opp mot mellom anna Statoil Mongstad. Skulen leverer også elevar som vel å ta ei høgare utdanning, og som gjerne skaper seg ei karriere innan bedrifter eller offentleg sektor lokalt.
Det vert arbeid med å finna nye linjer og tilbod som kan vera med å styrke skulen i framtida. Ein viktig grunnpilar for AVS har vore linja for studiespesialisering og det må linja også vera i framtida. Men skulen må fylgja arbeidsmarknaden og ha linjer som utdannar fagfolk som både det private næringslivet og det offentlege etterspør. Vi ser at skulen alt no finn måtar å gjera seg meir attraktiv på, mellom anna ved å tilby eit programfag med hovudvekt på havsport.

No håpar vi at skuleungdom både frå Austrheim og frå nabokommunane støttar opp om skulen og søkjer seg til AVS når elevane i ungdomsskulane skal gjera sine val for framtida. Austrheim vidaregåande skule er ein liten, men god skule som ”stiller krav og bryr seg”. I tillegg ligg skulen som nabo til det området som har den mest spanande industriutviklinga i landet gjennom det som skjer på Mongstad. Og skulen ligg i ein attraktiv vekstkommune med god ”vind i segla”.

Med helsing gruppeleiarane i Austrheim kommunestyre

Per Lerøy (Ap) Harald Sognnes (H) Øivind Levinsen (FrP)

Liv Ulvøy (V) Inge Fonnes (Sp) Helge Dyrkolbotn (KrF)

Dette vart ein fest!!!

2009-06-19T19:18:00.001Z

Å få Kongeparet på besøk til Austrheim vart ein gedigen fest. Eg har vore heldig som har vore ein av dei som har jobba med opplegget for 17.juni 2009. Det har vore mykje arbeid for mange, men det har vore ei glede og ei rik oppleving. Det er ingen fasit på korleis det skal gjerast når Kongen og Dronninga kjem på besøk. Men det er mykje å ta omsyn til og mykje som skal klaffa. Og det har vore moro å registrera at ALLE har slutta opp om dette besøket. Same kven som har vore spurd om å gjera ein jobb – liten eller stor, har vore positive.
Å køyra gjennom kommunen og sjå at flagga var oppe på nesten alle stenger gleda stort. Og frammøte på Fonnes kai vitna om at dette var ei hending som mange ville ha med seg. Det vert sikkert litt slik at me tenkjer før og etter Kongeparet sitt besøk i Austrheim. Eller som Ivar Bergsvik mellom anna sa til avgangselevane ved Årås skule; ”Når de tenkjer tilbake og skal finna ut kva år de gjekk ut av skulen på kan de tenkja at det var det året Kongeparet var i Austrheim”.
Dei første som ville få med seg kongebesøket var på Fonnes kai fleire timar før gjestane skulle vera der. Og frammøte vart bra. Lag og organisasjonar som deltok på kaien gjorde eit godt inntrykk på Kongeparet. Takk skal de ha, både de som stod på stand og de som var på scena, bak scena og framfor scena.

Om kvelden var det kongefest for 450 personar frå Austrheim og Lindås i Mongstadhallen. Og for ein kveld dette vart! Kanskje det beste arrangementet som har vore arrangert i Nordhordland. God mat og drikke og eit forrykande show frå scena. Dronning Sonja held ein flott tale der ho skrytte over det ho hadde fått oppleva både i Lindås, på Mongstad, på Fonnes og ikkje minst under festmiddagen. Ho var imponert over alt born og unge her hjå oss kunne. Talen finn du her: http://www.kongehuset.no/c27454/tale/vis.html?tid=79039
Takk til alle aktørane for ein flott innsats og takk til Leif Egil Vatne for at du sto slik på for at dette skulle verta minnerikt for både kongeparet og alle oss andre.
Og skal eg vera litt personleg må eg vel innrømma at mottakinga på Kongeskipet Norge den 18.juni vart ei sterk oppleving. Kongeparet inviterte gjestar frå alle 6 vertskommunane i Hordaland, frå Bergen kommune og frå Fylkeskommunen om bord i Kongeskipet for å takka for at alt var lagt så godt til rette under besøket deira. Å få helsa på Kongeparet gjorde eit djupt inntrykk.

Frivillig glede

2009-04-19T22:12:00.003Z

No rullar fotballsesongen i gong rundt om i landet vårt. Fotball for aldersbestemte lag. Og foreldre og andre engasjerte i 1000-tal står på sidelinja og heier born og unge fram. Eg vil her framheva dei mange som gjer ein fantastisk flott frivillig jobb for desse unge. Ikkje berre i fotball, men musikkorps, songkor, speidar, sundagsskular og alle mulige andre aktivitetar som år etter år gjev born og unge fornuftige og spanande aktivitetar å halda på med.
Tenkt deg at me tok vekk alt frivillig arbeid. Eg trur det hadde blitt rart. Samfunnet vårt er bygd opp av frivillig arbeid. Kva gjer ikkje sanitetskvinnene, husmorlaga, Nasjonalforeningen og misjonsforeiningane for samfunnet vårt? Og Raude krossen? Slik kunne eg halde på med oppramsing av gode og viktige organisasjonar.

Krf ynskjer å støtta opp under arbeidet som vert gjort av frivillige rundt om i landet vårt. Frivilligheten må ikkje kvelast av byråkrati, kontroll og reguleringar. Vi må legge til rette for at organisasjonane kan få bruke tida til det dei brenn for, ikkje kvelast av papirarbeid. KrF vil også at ordninga med at frivillige lag ikkje får refundert moms på bygg og anlegg må endrast. Det må vera kva eit anlegg skal brukast til som tel, og ikkje kven som byggjer det.
Eg vert imponert og stolt når eg ser kor mykje godt frivillig arbeid som vert lagt ned i Austrheim. Både for born, unge, vaksne og eldre. Vi står på for kvarandre.
Eg er sjølv ein av dei som likar å bidra gjennom ulikt frivillig arbeid. Det kan ta mykje tid i periodar, men det gjev me meir enn det kostar. Det er sosialt, spanande og utviklande. Og den som står i frivillig arbeid kjem i kontakt med mange spanande menneske.
Når ein lurer på om alt det frivillige arbeidet ein legg ned er det berre til å ta turen til grasbana til Austrheim IL ein kampdag og sjå gleda born og unge som spelar fotball syner. Eller gå på konsert med koret eller korpset og opplev gleda dei unge syner.
Til dykk som står i det frivillige arbeidet. TUSEN TAKK FOR INNSATSEN!

Kva er det som skjer i samfunnet?

2009-03-04T20:59:00.002Z

Kva er det som skjer? Frp ropar høgt om at Islam snik seg inn over alt i samfunnet, formannen deira er redd for kva det kan bety for samfunnet vårt. Kva motiv Frp har for å køyre fram denne saka er ikkje godt å sei. Spela på framandfrykt? Er det rasistiske haldningar dei syner? Ikkje godt å sei.
Eg er nok ikkje av dei som fryktar snikinnføring av islam eller andre religionar mest. Eg er meir redd for at me ikkje tek godt nok vare på vår eigen kristne kulturarv. Der er regjeringspartiet SV meir farleg enn kva både Frp og andre religionar er. Og me er alle saman ein trussel for oss sjølv.

I staden for å frykte islamisering av landet vårt bør me heller verne om vår eigen kulturarv. Kvar vert det av enkle ting som bordbøna rundt om i heimane? Flau av å synge eit lite bordvers? Kan kristen formålsparagraf i skule og barnehage vera med på å stå imot andre religionar og samtidig syne vår eigen tradisjon? Eg meiner det. Og eg meiner det er viktig at me alle tenkjer oss om. Slik eg ser det vil et vera viktigare enn nokon gong å stå mot ”avkristninga” som regjeringa med SV i spissen prøver å få til.
Eg tenkjer, slik eg får innspel på at mange andre også tenker, at me må kunne sei at her i landet har me ein kristen kulturarv, og at me vil at denne skal vera rådande i landet vårt. Det betyr ikkje at me må sei tvert nei til alle andre religionar, men at me må byggja opp under det som er vårt særmerke. Dette må syna igjen i kvardagen vår.
Difor er det viktig at me lar borna våre verta døypt og konfirmert i ein kristen samanheng, me må verna om kyrkjeleg bryllaup og gravferd. Me må alle rett og slett henta fram igjen dei gode gamle kristne verdiane. Kor mange av oss les juleevangeliet i juletida? Kva betyr påska? Kanskje kan til og med dei ti boda han noko for seg som samfunnet vårt treng i dag. Ved å ikkje vera likegyldige til vår eigen kulturarv er me med på å synleggjera kva som skal vera gjeldande her i landet vårt. Ein god ide er å senda borna våre til ein av dei mange gode sundagsskulane rundt om i bygdene våre. Kanskje kan me vaksne melda oss til innsats i ein kristen organisasjon? Det er heilt sikkert bruk for fleire medarbeidarar.

Me kan faktisk vera med på å gjera noko med dette. Og det er lett.

YES! Kysten sigra

2009-01-29T20:38:00.004Z

Litt merkeleg å skulle sei det på ein slik måte, men på mange måtar er det slik det kjennes, no når ubåten ved Fedje skal hevast. Det er grunn til å rosa styresmaktene for vedtaket. Men det er enno større grunn til å takka folket på Fedje for kampen dei har ført, for innsatsen natur- og miljøvernorganisasjonane har lagt ned og for den støtta oposisjonspartia på stortinget har gjeve kystfolket. Les meir i bt.no.

Når vedtaket er gjort gjennstår jobben. Den vert ikkje enkel, mene g har stor tru på at det skal la seg gjera å heva ubåten utan å sleppe ut kvikksølv og anna ureining i havet vårt.

Landbruk i Austrheim

2008-10-04T21:37:00.002Z

Har vore på landbruksdag i Austrheim idag. TUSEN TAKK til dyktige arrangørar! Eg er verkeleg imponert over det som intersseorganisasjonane her fekk til. me fekk demostrert eit stort mangfald innan landbruket, fekk sett og kjøpt flott handverk, og borna fekk kost seg med traktorkøyring og hesteriding.
Best av alt; publikum strøymde til og koste seg. For meg var det to ting denne dagen har fortalt meg: 1) Landbruksnæringa er levande også i Austrheim, men dei treng ei slik markering
2) Me som publikum treng eit slikt arrangement å gå på.

Det siste er også viktig. det er ikkje så mange slike store arrangemnet i kommunen. Det eg kjem på som er i "same gata" er Fonnesdagen, Austrheim cup, Austrheimløpet og 8.mai markeringa i Selsøy. Eg meiner det er viktig at landbruket kan klara å arrangera årlege landbruksdagar, både for sin eigen del og for alle oss andre sin del.

Takk for ein flott dag.

KRL-faget

2008-01-28T20:46:00.000Z

Eg vert irritert når eg tenkjer på framlegget til endringa i opplæringslova som Regjeringa har sendt ut på høyring. No vil dei fjerna omtrent siste rest av kulturarven vår, av kristendommen i skulen. Eg forstår rett og slett ikkje kva dei tenkjer på. Skal me ikkje kunne framheva det vårt samfunn er tufta på gjennom 1000 år?? Saka var oppe i formannskapet 23.januar. Rådmannen sitt framlegg til vedtak støtta regjeringa sine endringar, dette var ikkje uventa sjølv om eg har sett at i andre kommunar kjem administrasjonen med argument mot lovendringa. Heldigvis er det kommunar og politikarar som talar statsråden midt imot. Signal frå både Lindås og Bergen tyder på dette, i Masfjorden og på Askøy gjekk kommunestyra inn for vedtak som ynskjer at me held fast på KRL-faget omtrent slik det er i dag. I nemnde formannskapsmøte prøvde eg å framma ein alternativ uttale, men fekk berre Venstre si stemme. H og Ap stemde imot. Men eg gjev meg ikkje. Me skal få dei andre med.

Elles har Edvard og eg sendt eit lesarinnlegg til Strilen og Nordhordland i dag. Me kan ikkje la denne saka stå ukommentert.

Kom med innspel på kva de meiner om høyringa frå regjeringa. de finn den her.

Her er lesarinnlegget vårt:

Skulen må gje kunnskap om kulturarven vår.

I vår tid er det meir enn kanskje nokon gang tidlegare, viktig å samla alle elever i eit fag som gjev eit felles kulturelt referansegrunnlag og bidrar til respekt mellom ulike livssyn, i tillegg til nødvendig kunnskap om vår eigen – den norske kristne og humanistiske arven. Regjeringa foreslår no ein endring av KRL-faget som avgrensar høvet til å lære om vår eigen kulturelle bakgrunn, og tar frå religiøse minoritetar kunnskap om historia til det landet dei bur i.

Regjeringa grunner disse dramatiske endringane med at Den europeiske menneskerettighetsdomstolen pålegg Noreg å endra KRL-faget. Men det er ingenting i dommen som tilseier at faget må raserast og gje dei kristne verdiane så liten plass i den norske skulen. Kunnskapsministeren utnyttar situasjonen for å få gjennom SV sine særstandpunkt.

Menneskerettane er viktige og skal respekterast, men at Regjeringa no raderar ut kulturarven vår i skulen kan ikkje forsvarast ut frå dette. I endringsforslaget vert alle religionar stilt likt og det skal ikkje lenger takast omsyn til den norske kristne kulturarven. I realiteten foreslår regjeringa å innføre eit fag der læraren må stå med stoppeklokke for å kontrollere at ingen religion får meir tid enn andre.

Det er viktig å kjenne sin eigen bakgrunn for å forstå andre sin, og då må også vår eigen bakgrunn være ein sentral del av pensum. KRL-faget som det står i dag, klarer den oppgåva det er å gje elevane eit grunnlag for forståing av ulike kulturar. Difor er det ikkje behov for større endringar i KRL-faget enn det som allereie er gjort sidan oppstart i 1997.

Denne saka vart behandla i Fomannskapet i Austrheim 23.01.08. KrF la der fram eit framlegg til vedtak som ynskte å ivareta kristendommen og kulturarven på ein betre måte enn regjeringa legg opp til i høyringsnotatet sitt. KrF sitt framlegg fekk berre støtte frå Venstre. Høgre og Arbeidarpartiet stemde diverre i mot dette.

Vi oppmodar alle til å medvirke til at Regjeringa sitt forslag til endring av KRL-faget ikkje vert gjennomført. Det er gledeleg å sjå at kommune etter kommune seier nei til endringsframlegget. Vi ynskjer at våre born også i framtida skal få ei god innføring i vår kristne og humanistiske kulturarv.

Edvard Bjerkestrand Helge Dyrkolbotn
Leder Austrheim KrF Gruppeleiar Austrheim KrF

Full av inspirasjon

2008-01-28T19:55:00.000Z

Eg må sei det er flott å kunne vera i eit parti som KrF. Eg var i helga på lokalpolitikerkonferanse i Stavanger med over 400 KrF-vener. Det vart eit løft for oss alle. Mange gode innlegg, leiartrio i storform, sang, fellesskap rundt måltida og blide og trivelege KrF politikarar frå heile landet.

Det vart snakka mykje om både kamp for dei svakaste i samfunnet, born som er utsette for vold og andre overgrep. Og det vart snakka om regjeringa sitt angrep på KRL-faget. Heldigvis syner det seg at fleie kommunar no sender inn høyringsuttalelsar som talar statsråden midt imot.

Dersom de vil lesa Dagfinn Høybråten sin tale i helga finn de den her. På KrF sine sider finn de også meir om KrF sin politikk.

Så over til lokalpolitikken her i Austrheim. No har både Edvard, Knut og eg blitt litt varme i trøya i lokalpolitikken. Me utfyller kvarandre på ein flott måte. Knut med erfaring, Edvard med alle grundige spørsmål og eg som den utålomodige som spring opp og ned på talarstolen.

Kva har me så fått utretta? Tja. Ikkje godt å seia. Men eg meiner budsjettet for 2008 fekk litt meir KrF profil enn det hadde i utgangspunktet. Litt små midlar til turstiar, litt til ungdom og andre små signalsaker. Diverre kom me ikkje i posisjon etter valet, og no ser me at Ap og H har funne kvarandre godt, og er lite villige til å gå inn på saker me andre kjem opp med i kommunestyre. Mellom anna stemde dei imot sterkare føring på at kommunale køyretøy skulle vera miljøvenlege, transportordning for både eldre og unge internt i kommunen, og det siste var at dei ikkje ville støtta vår uttale om å gå imot høyrigsforslaget om KRL-faget.

Men me er med godt mot, og vil framleis kjempa knallhard for å fremma KrF-saker. Me får i alle fall profilert oss.

Elles oppmodar eg dykk om å ta turen innom eit kommunestyremøte for å høyra og læra. Her er det i periodar mykje spanande som skjer. Oversikt over møta finn du her. Her finn du også sakliste og møteprotokollar.

Takk for støtta

2007-09-11T13:05:00.001Z

Så var valet over. Det vil seia, det er kanskje no mykje av arbeidet tek til. Det skal forhandlast om posisjonar og formannskapsplassar.

Eg er godt nøgd med resultatet me klarte ved årets val. Målet var at me skulle ha minst 3 representantar i kommunestyret, og det klarte me. Og eg trur me skal få til å føra god KrF poltikk om me kjem i posisjon eller er i opposisjon. Me må ha gode oppvekstvilkår for borna våre, gode skular og barnehagar, og me skal stå for ein god politikk for eldre. Me ynskjer at Austrheim skal vera ein god kommune å bu i.

Når det gjeld framtida for bloggen min, prøver eg å halda liv i den framover. Ynskjer å bruke den for å drøfte aktuelle politiske saker. Kom med innspel.!!!

Og takk for støtta til alle som har stemt på KrF!!!

Siste innspurt

2007-09-07T17:47:00.000Z

Om tre dagar er valet over. 10. september har vore avkryssa i almanakken i lang tid, og no er eg spend på kva veljarane synes om lista til KrF og om programmet vårt fell i smak for innbyggjarane.
Valdebatten me hadde onsdag synte at partia har mange av dei same sakene dei vil fronta. Det er ikkje lett å finna store skilnader om me les Høgre, Venstre, Senterpartiet, Arbeidarpartiet, Frp eller Kristeleg Folkeparti sine program. Difor vil dette kanskje verte ei "personval". Eg er glad for at me har ei god liste, og håpar den vert flittig brukt mandag.

I valprogrammet for Austrheim KrF vil du finna ei rekke oppgåver som partiet ønskjer å få gjennomført. Me veit at det ikkje er lett å løysa alle sakene me brenn for, men me vil stå på for at Austrheim skal vera ein god og trygg stad å leva, bu og arbeida.

Følgjande målsetjingar skal vera ei viktig rettesnor for KrF-arbeidet i lokalpolitikken i Austrheim i valperioden som kjem:
· Dei som treng det mest skal sikrast hjelp og støtte.
· Innbyggjarane skal verta møtt med respekt og få den hjelp dei treng.
· Miljøutfordringar må takast på alvor.

Til deg som er førstegangsveljar i Austrheim! (og andre veljarar i Austrheim)

2007-08-25T18:31:00.000Z

I år skal du for første gong vera med å bestemma kven som skal styra kommunen dei neste 4 åra. Di stemme er med og avgjer kven som skal sitja i kommunestyret og kven som skal bli ordførar i Austrheim.

Partia som stiller til val, meiner alle at dei har ein politikk som vil gjera Austrheim til ein god kommune å bu i, også for deg som er ung.

Når eg no skriv brev til deg, er det fordi eg vil at du som førstegangsveljar skal få vita litt om kva KrF står for. Me har mange oppgåver og utfordringar me ønskjer ta fatt på i lokalsamfunnet vårt. Men det er valet og du som veljar som er med og avgjer i kva grad vi i KrF skal vera med å påverka og forma ut lokalpolitikken i Austrheim dei fire komande åra.

Hovudmålet vårt er å gjera kommunen så attraktiv at du ønskjer å busetja deg her, gjerne etter at du har vore andre stader for å ta udanning og skaffa deg jobberfaring.
Difor vil me at barne og ungdomstida di skal vera så god og innhaldsrik som mogleg.

I Austrheim er me så heldige at det er mykje å ta seg til i fritida, men ikkje alle finn seg til rette med idrett og musikkaktivitetar. Diverre vart det eit sakn då kroa stengde for nokre år sidan, og ungdomsklubben har ikkje heilt klart å fylla dette tomrommet.

KrF ønskjer at ungdomsklubben skal kunne halda ope minst 5 kveldar i veka, og kanskje fungera som eit ungdommens hus med varierte og spennande aktivitetar. Vidare har mange unge etterlyst sjøsportaktivitetar som t.d. dykking og vannski. Dette er noko KrF er samd i, og me vil arbeida aktivt for at det skal kunna etablerast eit sjøsportsenter i kommunen.

KrF ønskjer også å kunna tilby fleire av dykk som er under utdanning ein sommarjobb når de er heime på ferie. Austrheim kommune må kunna etablera ordninga med Ungjobb som med hell har vore prøvd fleire andre stader.

Det er viktig for oss i KrF at det er tomtar for deg som ønskjer å flytta attende til kommunen etter utdanninga. Då vil det vera viktig for deg kvar tomtane er, og me vil arbeida for at det skal vera mulig å slå seg ned i alle delar av kommunen. Me må difor syta for at kommunen har gode skular og barnehagar, eit variert fritidstilbod og arbeidsplassar.
Til slutt vil eg be deg bruka stemmeretten din, enten ved å førehandsrøysta på kommunehuset, eller stilla opp i vallokalet på valdagen. Gjer deg nytte av retten din til å vera med på å bestemma kven som skal styra i Austrheim dei neste fire åra. Eg skal ikkje leggja skjul på at eg håpar du brukar KrF si liste, og gjev oss di stemme ved valet. Me ønskjer i alle fall å stå på for at me skal få ein god og triveleg kommune å bu i for deg som er ung.

Kom gjerne med innspel til gode saker som opptek deg som er ung i kommunen vår.

Eg ynskjer deg eit godt val!

KrF vil gje borna ein trygg oppvekst

2007-08-16T06:27:00.000Z

Gode oppvekstvilkår for barn og unge er ei hjartesak for KrF. Vi har ein heilskapleg politikk for å hjelpa småbarnsfamiliane med tidsklemma, sikre ein betre skule med eit trygt læringsmiljø og gje fleire utsette barn ein oppvekst i tryggleik – utan fattigdom og rus.

Kvardagslivet skal gå opp, det også. Difor har KrF alltid vore opptekne av å leggje til rette for barnefamiliar. Valfridom og gode ordningar er viktige stikkord for oss. Fridom til å pusle saman kvardagen slik ein ønskjer og slik det passer best for den einskilde familien.

Difor vil KrF:
- Satsa på barnehageplassar med god kvalitet til alle som ønskjer det.
- Auka kontantstøtta ytterligare slik at fleire får anledning til å bruke den.
- Gje foreldre meir tid til borna ved å utvida pappapermisjonen til ti veker.
- Halda fram satsinga på samlivskurs.
- Styrkje åleineforeldra sin økonomi og oppretta møteplassar der åleineforeldre kan skapa gode nettverk og få hjelp til barnepass.

KrF trur at ein god skule gjev ein god start i livet. Ein skule som dannar og utdannar. Ein verdiforankra skule der ingen elevar vert gjevne opp eller vert haldt tilbake. Ein skule som elevane fullfører og ikkje droppar ut av før dei er ferdige. Ein skule som gjer sterke elevar klare til å møta eit moderne og komplisert samfunn.

Difor vil KrF:
- Satsa på lærarane, blant anna gjennom ei mentorordning.
- Skapa eit positivt læringsmiljø utan mobbing.
- Tilføre skulen ressursar nok til å kunne tilby ein meiningsfull skulekvardag til alle elevar.
- Bekjempa ”drop out” frå ungdomsskule og vidaregåande.
- Styrkja rådgjevingstenesta og gjera overgangen mellom ungdomsskulen og vidaregåande lettare.

KrF sitt politiske program 2007-2011

2007-08-13T13:30:00.000Z

Politisk program for Austrheim KrF

2007-2011
www.krf.no/austrheim

Austrheim KrF ber om di røyst ved kommunevalet i haust. Når vi ber om di støtte ved dette valet, er det fordi vi vil arbeida med løysingar og prioritera saker som vi meiner er viktige både for deg og lokalsamfunnet vårt. Den støtta vi får ved valet, vil vera avgjerande for i kva grad KrF sitt valprogram og løysingar skal påverka det politiske arbeidet og samfunnsutviklinga i Austrheim i åra som kjem.
Meiner du at TRYGG OPPVEKST og BETRE ALDERDOM er viktige politiske målsetjingar, då er du samd i to av dei viktigaste satsingsområda for KrF i komande valperiode.
I valprogrammet for Austrheim KrF vil du finna ei rekke oppgåver som partiet ønskjer å få gjennomført. Me veit at det ikkje er lett å løysa alle sakene me brenn for, men me vil stå på for at Austrheim skal vera ein god og trygg stad å leva, bu og arbeida.

Følgjande målsetjingar skal vera ei viktig rettesnor for KrF-arbeidet i lokalpolitikken i Austrheim i valperioden som kjem:
• Dei som treng det mest skal sikrast hjelp og støtte.
• Innbyggjarane skal verta møtt med respekt og få den hjelp dei treng.
• Miljøutfordringar må takast på alvor.

Austrheim KrF ønskjer å påverka:
• Korleis me skal ha det i Austrheim i åra framover.
• Korleis det skal vera å veksa opp her, arbeida her og bu her.
• Korleis det skal vera å ha alderdommen sin her.

Partiet har viktige meiningar om dette, og listekandidatar som ønskjer å stå på for å gjera Austrheim til ein trygg og god stad å bu.
Les programmet vårt, og vi trur du vil finna at KrF står for løysingar som og er dine. Og når valet er over, bruk KrF-politikarane som dine talsmenn og ombod i lokalpolitikken og lokalsamfunnet.

Eg ønskjer kvar og ein av dykk eit GODT VAL!
Hugs at det er ved å bruka røysteretten du kan vera med å påverka korleis Austrheim skal verta styrt dei neste 4 åra.

Helge Dyrkolbotn
Ordførarkandidat for Austrheim KrF

KRF SITT GRUNNSYN
Kristeleg Folkeparti sin politikk og sitt politiske arbeid er forankra i dei kristne verdiane. På dette grunnlaget vil KrF arbeida for ei rettvis fordeling av samfunnsgoda og samfunns -pliktene. Alle har det same menneskeverdet, same kva rase, kjønn, alder, utviklingstrinn, kultur, religion eller livstilhøve den einskilde måtte ha.

Viktige satsingsområde for KrF
Kristeleg folkeparti har sett
TRYGG OPPVEKST og BETRE ALDERDOM som viktige målsetjingar for det politiske arbeidet i åra som kjem. Desse målsetjingane skal vera retningsgjevande for partiet sitt arbeid både i stat, fylke og kommune.

Ei viktig oppgåve for Austrheim KrF i komande valperiode vil difor vera
• å arbeida for trygge og gode oppvekstvilkår for born og unge,

• å leggja til rette for og sikra dei eldre gode tilbod og tenester, omtanke og omsorg.

Sjøkommunen Austrheim

Me bur i ein kommune som er omgitt av sjø. Dette er eit gode som me ønskjer at alle austrheimingar kan få nyta godt av. KrF vil arbeida for
• sjørelaterte arbeidsplassar,

• fleire badeplassar som er tilgjengelege for alle, også rørslehemma,

• at det i Austrheim vert etablert senter for sjøsport, gjerne i tilknyting til ungdomsskule / vidaregåande skule,
• at alle innbyggjarane får tilgang til sjøen gjennom fellesløysingar og/eller offentleg tilgjengeleg brygge og båtopptrekk og at det vert lagt til rette for båthamner og båtplassar for dei som bur i kommunen.
• at det ved Austrheim vidaregåande skule vert etablert liner som tek utgangspunkt i sjø og kystkultur,
• at det vert satsa meir på sjørelatert reiseliv i kommunen.

Heim, familie og bustadmiljø
Trygge heimar og nærmiljø gir barn gode oppvekstvilkår. Å verna om heim og familie og skapa gode oppvekstmiljø vil vera viktige oppgåver for KrF.
KrF vil arbeida for
• at det vert lagd til rette for både spreidd busetnad og bustadområde,
• at det vert lagd til rette for og stimulert til bygging av mindre bueiningar for nyetablerarar,
• gode og trygge leikeområde, både tilrettelagde og i friområde,
• at utbygginga av vatn og kloakk til Solend vert fullførd,
• at det vert utarbeidd ein samla plan for utbygging av vatn og kloakk i kommunen,
• at alle i kommunen får tilgang til breiband,
• at ein bygger ut veglys i grendene vår.

Tilbod og omsorg for eldre
Alle eldre har krav på eit verdig og sjølvstendig liv og å vera aktivt med i samfunnet. Kommunen må sikra at dei eldre får gode og målretta omsorgstilbod når dei treng det.
KrF vil arbeida for
• at kommunale hjelpetiltak tek utgangspunkt i dei einskilde sine behov,
• at dei eldre kan få bu i sin eigen heim / i sitt eige lokalmiljø så lenge dei sjølv ønskjer det,
• at dei eldre skal verta tekne med på råd, m.a. gjennom eldrerådet,
• at det vert lagd til rette for at eldre som ønskjer det, kan gjera seg nytte av seniorsenteret og andre aktivitetstilbod ikommunen,
• arrangement og opplevingar for eldre i kommunen, gjerne i regi Frivillegsentralen og / eller lag og organisasjonar.

Kultur og frivillig arbeid
Kulturaktivitetar i regi av frivillige lag, organisasjonar, ungdomsklubbar, kyrkje og idrett legg grunnlag for oppleving, aktivitet og læring. KrF vil ta vare på tradisjonar som har sitt utspring i den lokale kulturarven, og auka kunnskapen om desse.
KrF vil arbeida for
• å styrkja kulturarbeidet i samarbeid med frivillige lag og organisasjonar,
• at det vert tilsett kulturmedarbeidar / koordinator,
• gode vilkår for frivillige aktivitetar for barn og unge,
• at kyrkja får trygg økonomisk ramme slik at den er i stand til å utføra dei viktige oppgåvene den har i lokalsamfunnet vårt,
• kommunal støtte til forsamlingshus,
• å sikra Kulturdagane i Austrheim, Fonnesdagen og Kystsogevekene gjennom kommunal støtte, • ei vidare utbygging av idrettsanlegga ved Austrheimhallen,
• å oppretthalda Frivillegsentralen som formidlar av frivillig arbeid og hjelp.

Barn og unge
Det kristne menneskesynet må vera grunnlaget for all opplæring og utdanning. Heim, barnehage og skule må vera ein stad der barna opplever tryggleik og omsorg. Alle born og unge i Austrheim skal bli ”sett”.
KrF vil arbeida for
• tilbod om ”foreldrerettleiingskurs” som støtte til foreldre,
• eit godt tilbod i barnehage, skule og skulefritidsordning,
• at alle som ønskjer det får tilbod om plass i barnehage og skulefritidsordning,
• at alle elevar i 1. til 4. trinn får symjeopplæring,
• at Austrheimhallen vert ein aktivitetsarena og møteplass for barn og unge, m.a. ved å tilsetja driftsansvarleg / aktivitetsleiar,
• at det vert sett i gang eit vurderingsarbeid rundt framtidig ungdomsskule-struktur, med fokus på sosiale, pedagogiske, faglege og økonomiske konsekvensar, side 8
• at Austrheim vidaregåande skule kan vera ein god og tenleg opplæringsarena i og for lokalsamfunnet vårt,
• at det ved Austrheim vidaregåande skule vert lagt til rette for nye linjer retta mot lokal industri,
• eit aktivt barne-og ungdomsråd,
• at bassenget på Kaland vert halde ope gjennom heile skuleåret,
• at det vert sett opp ballbingar og andre nærmiljøanlegg i grendene våre,
• at alle elevar i grunnskulen får eit leirskuleopphald betalt av kommunen,
• arbeide for tenlege transportordningar slik at skule og barnehageborn kan gjera seg nytte av tilbod i lokalsamfunnet og nærmiljøet,
• utvida opningstid på den kommunale ungdomsklubben.

Næringsutvikling
Livskraftige verksemder er ein viktig berebjelke i lokalsamfunnet. I Austrheim ønskjer me fleire næringsdrivande velkomne. Austrheim må vera ein JAkommune når det gjeld å leggja til rette for verksemder og arbeidsplassar.
KrF vil arbeida for
• at 7 % av eigedomsskatten vert sett av til næringsfond,
• at Åråsvågen / Breidvika vert ein attraktiv stad for busetjing og næringsliv,
• eit nært samarbeid mellom kommunen og næringslivet,
• regional innsats og samarbeid for utviklinga av næringslivet i regionen og marknadsføringa av Nordhordland,
• å sikra at Austrheim har landbruksfagleg kompetanse i administrasjonen, gjerne i samarbeid med andre kommunar,
• å støtta etablering av småverksemder og yta positiv rettleiing,
• sommarjobbsentral og kommunale sommarjobbar for ungdommane våre,
• at kommunen møter utviklinga i Mongstad-området på ein offensiv og positiv måte.

Samferdsle og trafikk
Gode kommunikasjonar er viktig for busetnad, eit konkurransedyktig næringsliv og utviklinga av distriktet. Samstundes må forholda for dei mjuke trafikantane vera eit viktig satsingsområde.
KrF vil arbeida for
• at det vert bygd fleire gang-og sykkelvegar, særleg langs skulevegar, og at desse vegane får veglys,
• at vegen Slettebakken -Austrheim kyrkje vert utbetra og utbygd med gang-og sykkelveg, og utvida parkeringsplass ved kyrkja,
• at det vert bygd ny veg over Radøy slik at ein får ein ringveg med god standard gjennom Nordhordland,
• at den kommunale trafikksikringsplanen vert følgd opp,
• miljøprioritert gjennomkøyring gjennom Austrheim kommunesenter,
• permanent venterom og wc ved snøggbåtstoppen,
• eit godt kollektivtrafikktilbod til og frå kommunen,
• at dei kommunale vegane vert haldne i god stand.

Helse og sosial
Nærleik til innbyggjarane er viktig med tanke på dei tenestene ein yter innan helse og sosial.
KrF vil arbeida for
• stabile og nære helsetenester,
• gode sosialtenester,
• at dei som ”rekkjer ut etter ei hand” vert sett, får hjelp og vert tekne vare på,
• at eldre og funksjonshemma vert sikra trygge og tenlege bustader,
• at heimebasert omsorg vert prioritert gjennom ordninga med heimehjelp, heimsjukepleie og avlastning,
• eit godt og tenleg psykiatritilbod, også for born og unge,
• reduksjon av rusmiddelbruk og utsett alkoholdebut blant unge gjennom oppfølging av kommunen sin Rusmiddelplan,
• auka brukarmedverknad i den kommunale omsorgstenesta.
Omsorgstilboda skal så langt som mogleg tilpassast behova og ønskja til den enkelte brukar, •auka deltaking i arbeids-, kultur-og samfunnsliv for brukarar av den kommunale omsorgstenesta,
• at vi imøtekjem lokale behov og sentralt lovverk i eit langsiktig og heilskapleg perspektiv. Aktiv omsorg, meistring, eit meiningsfylt liv og høve til deltaking skal vera sentrale målsettingar. Austrheim kommune sin omsorgsplan skal synleggjera nødvendige verkemiddel for å nå desse måla.

Natur og miljø
Austrheim er eit vakkert naturområde som vi har ansvar for å ta vare på og utvikla . Det gir oss både ansvar og utfordringar. Det kristne forvaltaransvaret forpliktar oss til ei berekraftig forvalting av naturen og naturressursane.
KrF vil arbeida for
• at Austrheim skal vera ein rein og ryddig kommune m.a. gjennom fjerning av avfall og gamalt skrot,
• auka satsing på vedlikehald av kommunale eigedommar og utvida vaktmeisterteneste,
• at miljøkonsekvensar skal vurderast i alle kommunale saksframlegg som har konsekvensar for miljøet.
• bemanna oljevernbase i Nordhordland,
• auka tryggleik for skipstrafikken i Fensfjordområdet,
• energiøkonomisering i kommunale bygg,
• at turstiar og turområde vert haldne vedlike, og at det er stiar og område som er gjort tilgjengelege for rørslehemma,
• at det vert sett i gang tiltak som sikrar naturlandskapet vårt mot attgroing,
• at det vert etablert forsking og forsøk på alternative energikjelder som er i samsvar med naturgrunnlaget i kommunen vår,
• at kommunale køyretøy er miljøvennlege,
• å etablere Austrheim kommune som Miljøfyrtårn.

Servicekommunen Austrheim
KrF vil arbeida for
• at Austrheim skal vera ein JA-kommune i møte med m.a. innbyggjarar og næringsliv,
• god dialog med innbyggjarane for å utvikla treffsikre tenester,
• aktiv bruk av brukarundersøkingar i høve til dei kommunale tenestene,
• styrkja det interkommunale arbeidet på område der dette er tenleg,
• at alle som tek kontakt med kommunen får svar og rettleiing, og vert møtt med respekt,

Det lokale folkestyret deltaking og engasjement i lokalpolitikken

Austrheim kommunen står overfor viktige utfordringar i åra framover når det gjeld å følgja opp og vidareutvikla det politiske styringssystemet i kommunen og leggja til rette for auka deltaking og engasjement i lokalpolitikken.
KrF vil
• at den politiske styringsmodellen i kommunen vert følgd opp og evaluert,
• at brukarane vert tekne meir med i utforminga av kommunale tenester,
• at ungdommen må engasjerast i lokaldemokratiet,
• at ordninga med innbyggjarinitiativ og lokal forslagsrett vert eit lokalt demokratitiltak,
• at kommunen satsar på og held seg à jour når det gjeld bruk av internett og informasjons-og kommunikasjonsteknologi,
• vektlegga samarbeid og samhandling mellom kommunen og dei frivillige organisasjonane i lokalmiljøet og leggja til rette for at desse organisasjonane kan fungera som bindeledd mellom kommunen og det sivile samfunnet.

Valkampen er i gang!

2007-08-12T21:21:00.000Z

10.september er det eksamensdato for alle som er involvert i valkampen, og for veljarane. Me som stiller til val har tida fram til denne datoen med å overbevisa deg som veljar om at du bør gje di stemme til vårt parti. I Austrheim Krf er me godt førebudde på valkampen. Me meiner me har ei liste med gode kandidatar, og me har eit politisk program med mange gode og aktuelle saker.

Tema me tek opp i programmet er mellom anna korleis sjøkommunen Austrheim kan utviklast vidare, me er opptekne av korleis bustadmiljøet kan gjerast betre for heim og familiar, me er opptekne av situasjonen til både eldre, born og unge, og me kjem med innspel til korleis kultur og frivilligheten kan styrkast.

Me er også opptekne av både samferdsle og trafikk, næringsutvikling, natur og miljø, og me ynskjer å utvikla Austrheim som ein god servicekommune.

Dette er noko av det me tek opp i vårt politiske program.

Nokre av hjartesakene våre i programmet er små, men viktige:
- Gratis leirskuleopphald for alle elevane i grunnskulen
- Skyssordningar som gjer at eldre i kommunen kan ta del i aktivitetar mellom anna på seniorsenteret.
- Dei som treng det mest skal sikrast hjelp og støtte
- Innbyggjarane skal verta møtt med respekt og få den hjelp dei treng
- Miljøutfordringar må takast på alvor.

På bloggen vil eg i tida fram mot valet kome med fleire tankar kring programmet og viktige utfordringar i lokalsamfunnet vårt. Kom gjerne med innspel og tankar kring dette og andre ting som opptek deg.

Tilbod til eldre

2007-07-27T11:55:00.000Z

I Austrheim har me mange friske og raske eldre som er ein stor ressurs for lokalmiljøet vårt. Me har fleire aktive pensjonistlag og klubbar, og desse er synlege og gjer ein flott innsats for at både pensjonistar og andre. Det siste gode dømet er innsatsen Neptun pensjonistklubb har gjort i samband med opprusting av det gamle helsesenteret. Eg er glad for at me skal få på plass eit aktivt seniorsenter, og så langt som eg har registrert ser det ut til at dette kan bli riktig bra.

KrF i Austrheim er glade for at me no har klart å realisera seniorsenteret, og at det ser ut til at kommunen har funne ei driftsform som kan fungera. Men me er opptekne av at dette skal vera eit tilbod som alle eldre som ynskjer det kan ta del i. I programmet vårt har me med eit punkt som omhandlar dette, og me har eit håp om at det skal kunne gå an å organisera ei skyssordning som gjer seniorsenteret, og andre aktivitetar for eldre tilgjengeleg for dei som ynskjer dette. Slik eg ser det er ikkje dette noko som nødvendigvis skal vera gratis, men eit tilbod for dei som ynskjer det.

Dersom politikarane saman med administrasjon og lag og organisasjonar set seg ned og drøfter dette, skulle det la seg gjera. Det er ikkje noko godt signal å ha eit nyopna seniorsenter som ikkje alle kan gjera seg nytte av.

Sjølivets gleder!

2007-07-16T18:38:00.000Z

Før me igjen fekk skikkeleg vestlandsvær hadde me ein lang og god periode med skikkeleg flott sommarvær. Mange austrheimingar nyttar seg då av skjærgarden og dei flotte tilhøva me har rundt på sjøen hjå oss.

Me ynskjer at dette skal verta tilgjengeleg for flest mogleg, og at denne naturgjevne ressursen kan vidareutviklast.

I Politisk program for 2007-20011 har me med eit kapittel som omhandlar sjøkommunen Austrheim. Her har me med ein del punkt som me vil arbeida for å få realisert.

Dette går mellom anna på:
· fleire badeplassar som er tilgjengelege for alle, også rørslehemma
· at det i Austrheim vert etablert senter for sjøsport gjerne i tilknyting til ungdomsskule / vidaregåande skule
· at alle innbyggjarane får tilgang til sjøen gjennom fellesløysingar og/eller offentleg tilgjengeleg brygge og båtopptrekk

Er dette gode idear??? Er det andre måtar me kan utvikla bruk av sjøen på?? kom gjerne med innspel.

Ferietid

2007-07-08T16:31:00.001Z

Det har vore stille og roleg her på bloggen min i det siste. Grunnen er ganske enkelt at eg er inne i feriemodus.

Kjem til å vera ein del i Dyrkolbotn og nyta fred og ro der. Me er heldige her i Norge som har store urørte områder der me kan gå på tur og henta nye krefter.

Eg reknar med at det vert litt politisk arbeid også i ferien.

Ynskjer dykk alle god ferie.

Kvifor ikkje gje eit skikkeleg svar???

2007-06-28T20:53:00.000Z

I dag har eg vore på farten til Bergen i bil, og då pleier eg å nytta tida til å lytta på radio. I dag har lokalsendinga for NrK Hordaland stadig hatt oppe sløvågulukka for 4-5 veker sidan. Kurt Oddekalv i Miljøvernforbudet har vore interjuva ved fleire høve, og han verkar sint. No har han meld Vest Tank til politiet for miljøkriminalitet. Kanskje det er dette som skal til for at innbyggjarane i Gulen og Masfjorden skal få svar på kva som har forureina lufta deira.

Eg må sei eg stiller meg undrande til at det ikkje er nokon som ikkje har kunne gitt gode og tillitsvekkande svar i denne saka.

Når me har bedrifter som handterar farleg stoff i nærmiljøet vårt er det viktig at innbyggjarane kan føla seg sikre på at alle tenkelege førehandsreglar er tekne, og at alt vert handtert etter gjevne retningsliner.

No må politikarane i Nordhordland og Gulen stå saman om å få fram sanninga om kva som hendte i Sløvåg, og helseproblema lokalbefolkinga har klaga på må takast på alvor.

Bustadkommunen Austrheim

2007-06-25T18:46:00.000Z

I sommaravisene til lokalavisene våre er det annonser for dei ulike kommunane. Radøy profilerer seg som "Den grøne øya", og Masfjorden som "Du kjem ikkje utanom Masfjorden". I Austrheim si annonse er slagordet "Bustadkommunen Austrheim" lansert. Kva inneber så dette? Austrheim KrF ynskjer å kjempa for å at kommunen vår skal vera ein god og triveleg stad å bu. Det er mykje som skal til for å vera ein god bustadkommune. Ulike aldrar og generasjonar skal ha sine tilbod og velferdsgodar. TRYGG OPPVEKST. BEDRE ALDERDOM er to sentrale slagord for KrF i valkampen.

For oss betyr dette mellom anna at unge må ha gode tilbod som gjev meining i fritida. Det er ingen tvil om at me er heldige som har aktive og trivelege ungdommar som deltek i ulike fritidsaktivitetar, og dermed tilfører lokalsamfunnet mykje positivt.

Eg har vore så heldig at eg har fått delteke i eit mellombels utval som i litt over eit år har arbeid med å kartleggja alle tilbod til born og unge i kommunen. Her har me hatt representantar for frivillige lag og organisasjonar og me har hatt ungdommar som har delt sine tankar med oss. Og ein ting går litt igjen; dei unge ynskjer ein stad å kunne møtast. Etter at kroa måtte leggje ned drifta har dei unge mangla ein naturleg møtestad der det ikkje vert krevd noko meir enn det å møta opp. Eit av tiltaka Austrheim KrF kjem til arbeida for er at ungdomsklubben som held til i det gamle kommunehuset skal kunne halda ope meir. Me har tru på at det vil vera eit godt tilbod for ungdommen å kunne møtast på ungdomsklubben oftare enn onsdagane slik er i dag. Kva med å gjera heile bygget til eit "Ungdommens hus"?

Arbeidetet i det mellombelse utvalet har synt at det kanskje er mulig å få dette til dersom frivillige lag og kommunen samlar seg om det. Det vil også vera viktig å få til ei ordning der unge frå Kaland også kan gjera seg nytte av ungdomsklubben.

La oss saman få til eit ungdommens hus i Austrheim!

Hyllest til NGIR og miljøet

2007-06-20T17:03:00.000Z

Ein aktiv og moderne familie som den eg er ein del av produserer avfall, mykje avfall, ja alt for mykje. Me er diverre blitt ein del av bruk -og kast samfunnet. Men når det ein gong er blitt sånn prisar eg meg lykkeleg for NGIR og gjenbruksstasjonen på Litlås. Kvar tysdag og laurdag kan eg fylla i bilen og tilhengar og køyre bort alle mogleg typar avfall. Materialrestar, restane av ein gamal sykkel, øydelagde blomsterpotter og gjerderestar er berre litt av det eg har kunne blitt kvitt dei sinaste åra.

Kva hadde vore alternativet for meg og alle dei andre eg treffer på min tur med avfallet? Kaste det langs vegen, grave det ned i hagen, bruke hyttecontainarane eller kva? Difor vil eg her hylla NGIR for den ordninga med gjenbruksstasjonane dei har laga til i distriktet vårt.

Men det er her glippen i logikken kjem inn. Kvifor fjerne denne flotte og miljøvenlege ordninga frå Knarvik? Er det noko miljøvenleg at alle dei som bur i Meland og Knarvik-området skal setje seg i bilen og køyre til Kjevikdalen? Dette ser eg ikkje fornuft i. Det tettast befolka området i distriktet vårt må kunne ha ein gjenbrukstasjon i nærmiljøet.

Eg oppmodar difor på det sterkaste å finne ei ordning som gjer at denne glimrande ordninga vert oppretthold .

Og tenk; mykje av det eg og andre kastar, kan andre kjøpa i bruktbutikken i Knarvik. Enkel og genial ordning!!

Takk for positive tilbakemeldingar

2007-05-26T20:56:00.000Z

Eg har gått inn mot dette valet med å vera ordførarkandidat for KrF her i Austrheim. Det er ei oppgåve er veit er krevande og forpliktande. I Austrheim har det vore to KrF ordførarar i "moderne" tid. Knut Risnes og Rolf Sandstad. Begge har vore, og er, markante skikkelsar i kommunen vår. Difor er det med stor respekt eg har påteke meg oppgåva.

Etter at det vart kjend at eg stod på topp på KrF lista har eg fått mange, utruleg flotte og positive attendemeldingar frå ulikt hald. Når folk som aldri tidlegare har stemt på KrF fortel at ved dette valet ynskjer dei å gjera nettopp det, vert eg både stolt og litt skremd. Eg ser meir og meir at det forpliktar og at det vert stilt forventningar til meg etter valet. Difor er eg glad for at det på KrF lista står mange flotte kandidatar klare til å ta eit tak for kommunen vår dersom dei vert vald inn i kommunestyret.

Sjølvsagt er eg glad for at mange gjev gode tilbakemeldingar på at eg er ordførarkandidat, og eg håpar så mange som mogleg stemmer KrF ved valet. Ikkje først og fremst for at eg skal verta ordførar, men for eg veit at KrF vil arbeida ut frå eit god og tenleg program etter valet.

Styrking av det frivillige arbeidet i lag og organisasjonar, lage tenlege ordningar som gjer at eldre skal kunne gjera seg nytte av ulike tilbod, som til dømes det nye seniorsenteret, og ikkje minst gje born og unge gode og positive tilbod. Dette er mellom dei sakene me i KrF meiner er viktige å gripa fatt i.

Når det gjeld programmet til Austrheim KrF vil dette verta lagt ut på www.krf.no/austrheim når det er heilt klart forlansering.

Igjen, takk for gode tilbakemeldingar. Eg håpar at ein stemme til KrF er ei god invistering for lokalsamfunnet vårt.

17.mai er over

2007-05-20T20:30:00.000Z

17.mai - Grunnlovsdag og barnas festdag. Men ikkje alle stader. Me har i dagane før og etter nasjonaldagen sett i media at det er tendensar til at det er vanskeleg å få gjennomføra festdagen. Rett og slett fordi ein ikkje har nok frivillige til å gjera ein dugnadsjobb for å laga det til den festdagen det skal vera.

Heldigvis fekk både vaksne og borna her i Austrheim oppleva ein flott festdag etter godt gamalt mønster. Mange av oss starta dagen i kyrkja eller med gudsteneste på Kaland. Tog har me gått i og det har vore leikar og moro på Kaland skule og ved samfunnshuset. Også i Øksneset hadde ein laga til 17.mai moro. Det er flott å sjå festkledde austrheimingar som feirar Noregs nasjonaldag, som feirar at me er eit fritt og uavhengig land, ja som feirar fridomen. Men det gjev også rom for ettertanke; set me pris på fridomen? Er me glade for at me lever i eit så godt land og i ein så god kommune som me gjer? Det er viktig at ein er klar over at dette ikkje er kome utan at nokon har gjort ein innsats og slåss for det dei har trudd på. På biletet ser me Ludvig Korsøen som legg ned krans ved bautaen for å heidra dei som mista livet under 2.verdskrig. Også dei kjempa for det dei trudde på, slik Eidsvollmenna gjorde i 1814. Skal me framleis ha det trygt og godt i landet vårt må me kjempa for det, og me må læra opp komande generasjonar til å bli glade for det me har.
Skulle me då ikkje trå til alle saman og lage ein skikkeleg festdag kvar einaste 17.mai framover. Takk for innsatsen til alle dykk som gjorde årets nasjonaldag til ein fest for små og store.

Korleis ynskjer du å ha det i Austrheim???

2007-05-11T19:56:00.000Z

Kanskje skulle me politikarar oftare stilt dette spørsmålet til dykk som bur og arbeider i Austrheim. Me har nok litt lett for å berre sjå alt ut frå eige perspektiv. Det er viktig for meg å ta med meg erfaringar frå jobb og fritid når eg held på med politisk arbeid. Prøve å gjera politikken forståleg og aktuell for alle som bur i Austrheim. Sjølv om eg er aktiv og med på mykje, er det ikkje sikkert eg fangar opp alle behov og ynskjer for forbetringar folk flest eller særgrupper har. Difor håpar eg at du som les dette kan ta deg tid til å koma med konstruktive innspel på bloggen min. Kva synes du det er viktig at politikarane tek tak i her i Austrheim.? Kva skal til for å gjera dette til ein enno betre plass å bu? Kva trengst av tiltak for næringslivet? For lag og organisasjonar?

KrF i Austrheim set pris på innspel frå innbyggjarane. I samband med programarbeidet skreiv me brev til mange lag og organisasjonar, næringsliv og privatpersonar. Me fekk ein del gode og kreative innspel, og mange positive tilbakemeldingar på dette. Faktisk kan me visa til fleire innspel som me har teke med i programmet til KrF. Takk til dykk som kom med desse innspela.

Flott val av nestleiar

2007-04-30T22:12:00.000Z

Eg er svært glad for at Inger Lise Hansen fekk tillit og no er vald til nestleiar i KrF. Eg trur dette var eit klokt og riktig val landsmøtet gjorde. Ved å velja ein ung, engasjert og dyktig politikar som Inger Lise er med på å syna at KrF er eit parti for alle, uansett alder og kjønn.

Og ikkje minst, ho er dyktig og er svært miljøbevisst.

Var det riktig av landsmøtet å satsa på unge Inger Lise Hansen, eller skulle ein gått for valkomiteens forslag???

Valet nærmar seg

2007-04-24T21:35:00.000Z

Kommunevalet nærmar seg, og partia i Austrheim bur seg til valkampen. Slik er det også i KrF. Me ynskjer det beste for kommunen og innbyggjarane, og difor arbeider me med eit kommunevalprogram som me håpar har truverdigheit og som appelerer til veljarane.

Målet vårt for valet vil vera at me skal få auke i talet på representantar. No har KrF 2 inne i kommunestyret. Etter valet i september skal me ha minst 3 representantar. Og me skal bidra med god KrF politikk.

Trygg oppvekst. Betre alderdom.

HelgeD